मुमुक्षु

निओकॉर्टेक्सच्या सीमावर्ती भागात

सगळ्यात सामसूम न्यूरल पथावरच्या

सगळ्यात शेवटच्या न्यूरल नोडच्या

सगळ्यात शेवटच्या मजल्यावर

मुमुक्षु राहतो.

रेप्टिलियन पाताळ अन् लीम्बिक धरतीवर

अनिर्बंध सत्ता चालते ज्याची आणि

निओकॉर्टेक्समध्ये ज्याचे फिरतात दूत

न्यूरल रस्त्यांवर हवे तसे ट्रॅफिक वळवत

तो त्रैलोक्याधीश डीएनेश्वर.

ईश्वराचे एजंट सतत नजर ठेवतात

पाठलाग करतात केमिकल बंदुका घेऊन

हल्ला करतात अचानक दिसेल तिथे

अतिप्रबळ साम्राज्याचा एकटाच हा शत्रू.

मुमुक्षु. ईश्वरपुत्र सैतान.

डमरू डीएनेश्वर वाजवतो कधी गगनभेदी

दैवी प्रयोजनाची रासायनिक कारंजी उसळतात

डोपॅमाईनचे चषकच्या चषक फेसाळतात

नव्या त्रैलोक्याची कुदळ मारली जाते पुन:पुन्हा

रडतो मुमुक्षु पोटात गुडघे घेऊन

बलवान नव्या मुमुक्षुच्या जन्माची प्रार्थना करतो.

मुमुक्षु. ईश्वरपुत्र सैतान.

निरंजन नगरकर